دليلك لأفلام عيد الفطر 2016

[ads1]

كل سنة وانتوا طيبين بمناسبة اقتراب عيد الفطر عيد سعيد عليكم .. طبعا في العيد كلنا بنحب نخرج ونقضي وقت حلو مع العيلة ومع اصحابنا ومن اكتر الاماكن اللي بنحب نروحها في العيد هي السينما لان دايما في الاعياد بيبقى في سباق بين الافلام وبتنزل كل الافلام الجديدة  ..

فيلم جحيم في الهند
الفيلم من بطولة محمد عادل امام, حسن حسني, ياسمين صبري, بيومي فؤاد, حمدي الميرغني, مصطفى خاطر, واحمد فتحي, والفيلم انتاج مشترك بين مصطفى صقر ومحمد عز الدين, واخراج معتز التوني..

 فيلم سطو مثلث
الفيلم بطولة احمد السعدني, وكلوديا حنا, وبيومي فؤاد, ريهام حجاج, وعبد الله مشرف, والفنان الراحل سعيد طرابيك وده اخر فيلم صوره قبل وفاته, وبتدور احداث الفيلم حوالين شخصية علي المراكبي اللي بيقوم بيها احمد السعدني اللي هيكتشف وصية لجده من العصر الفرعوني وبيرجع من خلال احداث الفيلم للماضي, الفيلم تأليف مشترك بين امين جمال ومحمد محرز, واخراج محمد يونس..

فيلم عسل ابيض
فيلم عسل ابيض مقتبس من الفيلم الامريكي اللي كلنا بنحبه ومعلم في ذكريات طفولتنا “Baby’s Day Out”, والفيلم بطولة سامح حسين, وبيومي فؤاد, وميرهان حسين, وكريم عفيفي, ولطفي لبيب, ودينا محسن, واحمد راتب, ومصطفى بسيط, وشيماء سيف, والفيلم تأليف محسن رزق, واخراج حسام الجوهري..

 فيلم 30 يوم في العز
الفيلم بطولة سعد الصغير, واحمد فلوكس, وصافيناز, ومحمود الليثي, وسليمان عيد, وشيماء سيف, والفيلم بتدور احداثه حوالين شاب وبنت عايشين في حارة شعبية وهيحبوا بعض وبتحصل بينهم مشاكل كتير ومواقف كوميدية, والفيلم من تأليف سيد السبكي, واخراج هاني حمدي..

فيلم من 30 سنة
احمد السقا العيد ده هيكون معانا من خلال فيلم من 30 سنة وهيشاركوا بطولة الفيلم مجموعة كبيرة من الفنانين منهم منى زكي, شريف منير, ميرفت امين, احمد فهمي, وصلاح عبد الله, ونور اللبنانية, والفنانة الصاعدة جميلة عوض, وبتدور احداث الفيلم في اطار تشويقي حوالين شريف منير اللي بيحلم كل يوم بكوابيس انه بيقتل شخص ميعرفوش وبيصحى تاني يوم يلاقيه فعلا مقتول وبيروح يستنجد بصديقة اللي بيقوم بدوره احمد السقا الفيلم تأليف ايمن بهجت قمر واخراج عمرو عرفة..

فيلم بارتي في حارتي
بطولة محمد لطفي, وصلاح عبد الله, ودينا, والمطربة الشعبية امينة, ودياب, وعبد الله مشرف, وايمان السيد, ومن المتوقع ان برومو الفيلم ينزل خلال ايام, والفيلم من تأليف احمد عيسى, واخراج يونس..

 فيلم الباب يفوت امل
بيقوم ببطولة الفيلم شريف سلامة, ودرة, وياسر الطوبجي, وخالد عليش, واحمد راتب, وشيماء سيف, ومحمد متولي, والفيلم بتدور احداثة حوالين المشاكل الزوجية ودرة بتقوم بدور محامية ومتجوزة من دكتور بيطري اللي بيقوم بدورة شريف سلامة وبتحصل بينهم مواقف كتير كوميدية, والفيلم من تأليف مجدي الكوتش, واخراج احمد البنداري..

فيلم ابو شنب
فيلم ابو شنب بطولة مشتركة بين ياسمين عبد العزيز وظافر العابدين, وبيشاركهم البطولة بيومي فؤاد, لطفي لبيب, ورجاء الجداوي, وبتدور احداث الفيلم في اطار كوميدي حوالين ظابط شرطة نسائية اللي بتقوم بدورها ياسمين وبتتعرض خلال شغلها لتحرش جنسي وبتقرر من اللحظة دي انها تتصدى لظاهرة التحرش الجنسي في المجتمع, الفيلم تأليف خالد جلال, اخراج سامح عبد العزيز..