تنظيف البشرة الطبيعي بالزيوت بدل من استخدام غسول الوجه!!
و هو فيه حاجة اسمها كدا فعلا؟؟
أيوا فيه!.. في وسط ال Research عن البشرة الدهنية،
و كمية المشاكل اللي بقراها في استخدام المنظفات العميقة اللي ممكن تنشف البشرة الدهنية او تهيجها فتفرز دهون أكتر،، فلقيت حل طبيعي و منزلي و سهل الإستخدام..
بس طريقة غريبة شوية..
اي حد هييجي ف مخه، ازاي استخدام زيت على بشرة بتفرز زيوت،، هينضفها؟ حاجة مش منطقية لأول وهلة.. بس من ابسط مباديء الكيماء ان الزيوت بتدوب الزيوت!
الطريقة بتختلف من نوع بشرة للتاني، و ممكن تبتدي تغيري في المقادير حسب نوع بشرتك لغاية ما توصلي للنسب اللي بتمشي معاكي..
ممكن تحسي في اول اسبوع استخدام ان الطريقة دي مش مفيدة علشان بشرتك لسه بتتعود عليها فالبشرة الدهنية غالباً هتفرز كل الدهون الزايدة اللي جواها لأن الزيت بينضفها من جوا، و بعدين هتتعدل.. حاولي ماتستلميش من أولها و تستني تشوفي النتيجة بعد المواظبة اسبوعين.
التنظيف بالزيوت، هتحتاجي نوعين زيوت طبيعية و فوطة نضيفة..
من أكتر الأنواع اللي بتستخدم مع بعض هي زيت الزيتون و زيت الخروع. زيت الخروع معروف بأنه “مادة قابضة” معناه انه بيرغم الشوائب من انها تخرج من المسام، وده بيخليه مثالي للبشرة الدهنية و المركبة ، و البشرة الجافة بس بكميات أقل.
مينفعش تستخدمي زيت الخروع بشكل مركز على الجلد، بس هاكتبلك المعايير حالاً. و يفضل دايما انه يتحط نسبة اكبر مرتين او اكتر من الزيت التاني معاه.
* للبشرة الدهنية هتحطي 1\3 زيت خروع او زيت جوز (عين جمل) مع 2\3 زيت زيتون او زيت عباد الشمس ( صافي)
* للبشرة المركبة: 1\4 زيت خروع او زيت جوز مع 3\4 زيت زيتون او زيت عباد الشمس
* للبشرة الجافة: اي زيت مغذي زي زيت الزيتون او كمية قليلة جدا من زيت الخروع او الجوز تتضاف عليه.
– طريقة الإستخدام:: و انتي بتستحمي، او قبل ما تغسلي وشك عادي، بس تحضري فوطة في مية سخنة… من غير ما تبلي وشك.. هتاخدي ربع الكمية اللي عاملاها من الزيوت في ايدك و تغسلي بيها وشك و تحاولي تعملي مساج لمدة دقيقتين و بعدين تسيبيه على وشك لمدة 10 دقايق علشان تتأكدي ان كل المسام اتنضفت.
– مش محتاجة تشيلي المكياج من على وشك قبل التنضيف ده لأنه بيشيل المكياج بشكل طبيعي.
– حطي الفوطة تحت مية سخنة جدا و شيليها بسرعة و اعصريها، و حطيها على وشك لمدة دقيقة او لغاية ما تبرد، و كرري الموضوع ده على الناحية التانية النضيفة من الفوطة، و في آخر مرة بالجوانب اللي لسه ماجاش عليها زيت و تمسحي بيها الأجزاء اللي لسه ماتشلش منها الزيت زي جوانب المناخير .
– الفوطة السخنة هتعمل زي حمام البخار اللي هيساعد في انه الزيت يتشال.
– هيتبقى طبقة رفيعة من الزيت على الوش، و دي حاجة مفيدة كمرطب طبيعي، و احتمال للبشرة الدهنية مش هتحتاجي تحطي مرطب تاني طول اليوم.
– الفكرة من العملية دي انك ماتستخدميش غسول وش في مواد كيميائية و اللي ممكن يبقى فيها أثر معاكس لو مالقيتيش الغسول المناسب ليكي. فحاولي تقاومي احساسك بأنك عاوزة تستخدمي صابون علشان تشيلي المتبقي من الزيت، لو طلعلك تهيج في البشرة اول اسبوع كرد فعلا، ده غالباً بشرتك لسه بتتأقلم مع الطريقة الطبيعية و بتطلع الزيوت اللي فيها..
– ممكن تحتاجي تجربي في نسب الزيوت لغاية ما توصلي لأكتر نسبة مناسبة لبشرتك.. جربي تبتدي بأقل نسبة محطوطة لنوع بشرتك فوق ( زي معلقة زيت خروع او زيت لوز قصاد 4 معالق زيت زيتون للبشرة المركبة) و تزودي مع الوقت لو مش مناسبة.
لــ نهال هشام
