القرفة من المشروبات اللذيذة جدا ومن انواع التوابل اللي بتتحط على كتير من الاكلات والحلويات وبتديها طعم وريحة حلوة جدا لكن فوايد القرفة مش بس كمشروب او للأكل لكن هي ليها فوايد كتير جدا للبشرة لانها مليانة بالمواد المضادة للأكسدة وزي ما كلنا عارفين دي اد ايه مفيدة للبشرة ده غير ان فيها مضادات للبكتيريا وللفطريات وحاجات كتير هنعرفها في موضوعنا هنعرف وصفات من القرفة لجمال بشرتنا..
ماسك القرفة والشاي الاخضر:
الماسك ده بيرطب البشرة جدا وبيجددها..
المكونات :
*معلقة كبيرة شاي اخضر.
* معلقة صغيرة عسل نحل.
*شوية قرفة صغيرين.
* نص معلقة كبيرة مية مغلية.
* نقط زيت خشب الصندل ” من عند العطار”.
طريقة التحضير:
نطحن الشاي الاخضر ونضيف عليه العسل والقرفة ونضيف المية المغلية واحدة واحدة لحد ما يبقى سمكه معقول ونحط الخليط على البشرة ونسيبه 20 دقيقة وبعدين نغسله ..
سكراب لتقشير الشفايف:
السكراب ده بيقشر الشفايف وبيعالج تشقق وجفاف الشفايف..
المكونات:
*سكر ابيض او بني.
* زيت جوز هند.
* شوية قرفة.
طريقة التحضير:
هنضيف السكر مع جوز زيت جوز الهند من غير ما ندوبه هنستخدمه زي ما هو ونضيف عليهم القرفة ونقلب الخليط كويس خدي من الخليط بصوابعك وابدأي افركي بيه الشفايف ولو عندك باقي من الخليط ممكن تحتفظي بيه في برطمان وتحطيه في التلاجة ممكن يقعد عندك اسبوعين بس قبل ما تستخدميه طلعيه من التلاجة قبلها بخمس دقايق وبعدين استخدميه ..
سكراب القرفة والقهوة للجسم:
السكراب ده بينشط الدورة الدموية وبيخلص الجسم من مشكلة السيلوليت وبيدي الجسم ريحة حلوة جدا..
المكونات:
*نص فنجان قهوة.
* نص كوباية سكر بني.
* تلت كوباية زيت جوز هند.
* معلقة صغيرة قرفة.
طريقة التحضير:
هندوب زيت جوز الهند على النار وبعدين نضيف عليه باقي المكونات ونخلطهم مع بعض كويس افركي ايدك كويس عشان تديها حرارة وخدي من الخليط وافركي بيه الجسم بحركات دائرية قوية وبعدين اغسلي جسمك واحتفظي بباقي الخليط في اي برطمان عندك لحد ما تيجي تستخدميه تاني ..
