للبنات وضع خاص في التعامل وللبنات وضع خاص في الأسلوب ومينفعش ان احنا نقارن ما بين الولد والبنت في حاجات كتير ، لأن في حاجات كتير مشتركة ما بينهم لكن فيه حاجات اكتر مش مشتركة ما بينهم !
الموضوع بعيد كامل البعد عن القصص بل فضفضة ووجه نظري كولد عن ان للبنات ليهم وضع خاص
للبنات وضع خاص في مجال العمل غير الولد ، الولد ممكن يشتغل اي وقت على مدار اليوم غير البنت لازم يكون فيه مواعيد بتحكمها عشان المجتمع الشرقي اللى احنا عايشين فيه بيربطنا بده ، لذلك صعب انك تلاقي بنت بتشتغل في اكتر من مجال هو مجال واحد لكن مجالين في نفس الوقت ده مستحيل وطبعا ده غير الولد لأن الولد ممكن يشتغل في اي وقت على مدار اليوم ، يقدر يشتغل في اكثر من مجال عمل وعشان كده مش عاوزين البنات تفهم ان الشغل للولاد وبس وهما ميصحش يشتغلوا لا بالعكس يشتغلوا عادي بس يختاروا المكان الصح اللى لا هياثر عليهم في الوقت ولا يسبب أي نوع من المشاكل لان البنت لها وضع خاص
للبنات وضع خاص في التعامل مع البائعين والسواقين والموظفين وغيرهم لأن البنت بطبعها بتكون خجولة او مبتعرفش تتكلم غير الولد بيكون بطبعة جرئ شوية فـ دي حاجه بتميز كل بنت ، فـ متسمعيش كلام حد لما يقولك اتكلمي وخليكي جريئة والكلام ده كله لا بالعكس انتي كده مش غلط بس في نفس الوقت متبقيش ساكت خالص وتخلي خجولك يغطي على كل حاجه لذلك انصحك بأن خير الامور الوسط
للبنات وضع خاص في المجتمع ودي اصعب حاجه زي ان لو حد دخل كافيتريا وشاف بنت قاعده بأحترامها هيفهمها غلط وده مش بسببها البنت مش عليها اي ذنب ، ده بسبب ان احنا اصبح عندنا فكره ان الكافيتريا دي مكان للألفاظ الخارجة وللشيشة ولحاجات تانية كتير ! طب السؤال هنا هو الالفاظ الخارجة في الكافتريات بس ؟ ماهي موجودة في الشارع والنوادي والاتوبيسات وكل مكان .. أذا الغلط مش على البنت والغلط هنا لو محكوم على حد فمحكوم على الشباب او الاداره التابعه للمكان ده انها مش عامله ظوابط وروابط تحكم المكان ان ممنوع الالفاظ وممنوع حاجات تانيه كتير في حال وجود البنات وغير كده انت حر بالرغم ان القانون المفروض يمشي في جميع الاوقات
للبنات وضع خاص في الشكل العام ليهم ، مينفعش تقارني نفسك بالولد في أي حاجه وعلى سبيل المثال مينفعش انك تكوني بتحبي واحد يغيظك يكلم بنت تغيظيه تكلمي ولد ده مش صح لأنك بنت والولد اللى هتكلميه ما هيصدق انك تكلميه وممكن يؤدي لحدوث مشاكل قدام ، لازم تكوني اعقل في كل حاجه تصرفاتك وقراراتك واسلوبك اللي بتتكلمي بيه عشان متقعيش في الغلط ، مينفعش تقارني بينك وبين الولد في ان الولد عادي بيشرب سجاير فـ ليه انا مجربش وابقى زيه او بينزل في اي وقت ويخرج في اي وقت يسافر في اي وقت ، الحاجات دي كلها متخليش عقلك يفكر فيها او يقربلها
[divider]
اللى عايزك تستنجه وتستنجيه من الكلام ده !
ان للبنت وضع خاص في المجتمع واللى مترضاهوش على أختك ، مترضاهوش على بنات الناس .. والموضوع بكل سهولة وببساطة شديدة مش معقد حاول تخلي تعاملك مع الولد حاجه والبنت حاجه تانيه خالص ، ولازم تفرق ما بين هزار الولاد وهزار البنات ومش معنى كلامى فوق ان التدخين مضر بالصحة للبنات وعادي للولاد لا بالعكس هو غلط للكل لكن كلامي كان في محور ان لو البنت شربت دي حاجه والولد حاجه لذلك البنت لازم تحافظ على اسمها وشكلها وسمعتها قدام نفسها قبل اي حد وقدام المجتمع ككل
نصيحة للولاد #خاف_على بنات الناس
نصيحة للبنات #خافي_على_نفسكُ