طبعا كلنا عارفين ان الملكة كليوباترا كانت معروفة جدا بجمالها الملفت وجمال جسمها وبشرتها وشعرها ولما يتكتب عنها دايما لازم يكتبوا عن جمالها وقد ايه كانت بشرتها حلوة وصافية ودايما بنسمع ونقرا عن حمامات اللبن والعسل اللي كانت بتستحمى فيها وان على طول كانت ريحة جسمها حلوة ومميزة ومش بس بشرتها كمان جمال شعرها وقد ايه كان صحي وناعم واكيد كلنا بنسأل وحابين نعرف سر جمالها ده في موضوعنا هنعرف شوية اسرار للجمال من الملكة كليوباترا ..
* حمام اللبن:
اول سر للملكة كليوباترا هو حمام اللبن ده تقريبا اكتر حاجة كانت معروفة عنها انها كانت بتستخدم حمام اللبن والعسل مع زيت اللوز عشان تخلي بشرتها ناعمة ومنورة وصافية عشان تعملي حمام اللبن اخلطي 3 كوبايات من اللبن مع نصف كوب عسل ابيض ومعاهم 5 معالق كبيرة زيت لوز وحطي الخليط ده في البانيو مع المية وانقعي جسمك فيه من نصف ساعة لساعة الحمام ده بيطري الجلد وبينعم الجسم جدا وبيخليه صافي من اي شوائب وعيوب..
كانت دايما بتستخدم الملح لتقشير بشرتها وجسمها اخلطي 3 فناجين ملح ناعم مع 3/4 فنجان زيت زيتون و3/4 فنجان زيت لوز حلو وكام نقطة من اي زيت عطري تختاريه احتفظي بيه في برطمان زجاجي وخدي من الخليط اللي يكفي بشرتك وجسمك وادعكيه كويس في حركات دائرية وبعدين سيبيه خمس دقايق وبعد كده اغسليه بمية دافية الخليط ده بيشيل كل الخلايا الميتة وبينعم البشرة جدا ويخليها طرية وبيخلي ريحتها حلوة والافضل انك تعملي تقشير الملح بعد حمام اللبن عشان يجيب معاكي نتيجة احسن..
من الحاجات اللي كانت بتستخدمها لبشرتها كانت بتعمل سكراب بالعنب بتنضف بيه بشرتها عشان تعملي نفس الاسكراب ده هتجيبي العنب الاخضر وتهرسية كويس وتضيفي عليه عسل ابيض وتخلطيهم كويس مع بعض وتحطيه على وشك وتسيبيه ربع ساعة وبعدين تغسليه كويس بمية دافية..
* الزيت والليمون لتنضيف البشرة:
كان من روتينها اليومي خليط الزيت والليمون عشان تنضف بشرتها كانت بتغسل بيه بشرتها اكتر من مرة في اليوم اخلطي اي نوع زيت مناسب لبشرتك مع الليمون اغسلي بيه وشك وبعدين اشطفيه بخليط خل التفاح والمية اللي احنا قولنا عليه ده هيخلي بشرتك على طول نضيفة ومنورة..
