مفيش حد فينا تقريبا ما بيشربش شاى لان المصريين بطبعهم بيحبوا الشاى جدا بنحب نشرب شاى بعد الاكل واول لما نصحى من النوم لكن بعد ما بنشرب الشاى دايما بنرمى اكياس الشاى او ” فتلة الشاى ” لاننا مبنلاقيش ليها اى فايدة بس هنعرف في موضوعنا استخدامات مفيدة لاكياس الشاي بعد استعمالها هتخلينا منرميهاش ..
الشاى الاحمر العادى اللى بنشربه اكتر من مرة فى يومنا ممكن تستخدميه فى تنظيف البيت هنمزج 2 فتلة من الشاى بعد ما نشربه ونسيبه يتنقع فترة فى مياه سخنه بعد مرور الوقت يعنى حوالى من ربع ساعة ل 20 دقيقة استخدمى المياه دى فى مسح ارضية البيت خصوصا لو كانت من الخشب او ” الباركيه ” هيخلى الارضية نظيفة جدا و بتلمع كأنها لسه جديدة و ممكن كمان تستخدمىالطريقة دى فى تليمع الانتيكات او الانتريه والكراسى الخشب و كمان المرايات و ازاز الشبابيك ولنتائج أفضل استخدمى قطعة قماش قطنية فى التلميع او حطيه فى رشاش من بتاع المياه زى اللى بنستخدمه و احنا بنكوى الهدوم ..
اكياس الشاى المستعملة ممكن تستخديها فى ازالة بقع الشحم او الشمع من على الهدوم او بواقى الشمع اللى بتكون على الشمعدانات حطى كيس الشاى المبلول بمياه دافية على البقع و سيبيه شوية و بعدين افركى البقعة بمسحوق الغسيل العادى بتاعك والشمعدانات لمعيها بفوطة قطنية مبلولة بالمياة المنقوع فيها اكياس الشاى ..
* لجمال بشرتك :
الشاى الاخضر مفيد جدا جدا لبشرتك و بنعتبره علاج غير مكلف اطلاقا بيضمن جمال بشرتك و نعومتها ونضارتها لانه بيحتوى على فيتامينات مختلفة و كتيرة جدا بتقدر تفيد جسمك و بشرتك ..
* ازالة الروايح من البيت:
اكياس الشاى المستعملة ممكن تستخدميها كمان فى ازالة الروايح من البيت هتنقعى اكياس الشاى فى المياه اللى بتنضفى او بتمسحى بيها الارضية وممكن كمان تعلقى اكياس الشاى العطرية فى عربيتك او فى شنطتك بعد ما تنشف علشان تخلى فيها دايما ريحة حلوة و معطرة او ممكن تحطيها على رف الثلاجة علشان تضيع الروايح الغير مستحبة منها و ممكن كمان فى حذائك او فى الدولاب واكياس الشاي مفيدة جدا فى ازالة راويح الطبيخ افركى ايدك بفتلة شاى بعد تقطيعك للبصل او الثوم و هتلاقى الريحة اختفت على طول ..
* الاغراض الجمالية
كلنا عارفين ان اكياس الشاى الفتلة مفيدة جدا فى القضاء على الهالات السوداء و انها بتريح العين جدا و بتساعدك على الاسترخاء لما تحطيها على عينيكى وممكن كمان تستخدمى المياه المنقوع فيها اكياس الشاى و تشطفى بيها شعرك ده بيساعد فى انه بيدى الشعر لمعة حلوة و بيساعد فى انه يكون اقوى ..