ايمان بكرى شاعرة ولدت بالقاهرة عام 1955م
اشتهرت بالشعر العامى الساخر وأيضا كتبت بالفصحى
كلمات قصيدة ديمولوخية
سألت جارتنا أم بهية
جوزها العامل فى البلدية
ما تقوللى يا لفندى يا جوزى
معنى الكلام الأراجوزى
اللى قالوه فى التلا فز يون
ديمراقراطية .. ديرنقاطية
كلمة ما تيجى يوم على بال
واحلف دى شتمة يا عبد العال
قام قالها السيد جوزها
وهى بتمط فى بوزها
ما تبطلوا جهل يا جدعان
ديموقراطية يا بهية
ما تفهمى بقى يا ولية
ديمقراطية .. ديمقراطى
خصم الكباب عند الحاتى
واتعشى على كيلو حراتى
وانا أبوس فى أورطاس طعمية
ديمقراطية ومقرية
فى صحف جرايد مطوية
بتقول نعم بكرة وبعده
ولحد ألفين سنة جاية
ديمقراطية دى لعبتنا
عملوها جدعان حتتنا
عشان ما تحلو صورتنا
ويصدقوا إن عيشتنا
عايمة فى بحور العسلية
ديموقراطية تدلعها
وساعات كتير نلوى دراعها
بس اشترى يوم عتقية
ديموقراطية .. ديموقراطرط
وكلام كتير وبقى مراطرط
والكل مبسوط ومسأطط
ببرباطوسه اللى مناأط
من كدبه بقى ماشى يساأط
على باب حارتنا المنسية
ديموقراطية اتكلم قول
تحيا البقول ويعيش الفول
رزق المدهول على المسطول
والعيشة حلوة مسلية
ديموقراطية و موش هية
بس الشبه عشرة المية
تسعة عشان العالمية
واحد لمون بالملوخية
ما تسكتى بقة يا ولية
فى داهية روحى انت وهية
دى عشان تفوت الوردية
وأعيش خروف من غير ليّه
وأموت قتيل وما ليش ديّه