الاهتمام اساس استمرار العلاقات الزوجية

الاهتمام هو اساس استمرار العلاقات الزوجية ولو الحياة الزوجية مفيهاش تجديد والروتين ثابت ومبيتغيرش هيحصل حاجات كتير محدش فينا بيحبها زى الجواز للمرة التانيه وممكن التالتة والرابعة ، وممكن الخيانة ، ووارد جدا الطلاق

والاهتمام ما بين الاتنين المتجوزين من وجهة نظرى مش لطرف قبل التانى بالعكس الاتنين زى بعض ولازم يكون فيه اهتمام من الراجل ومن الست فى نفس الوقت عشان العلاقة دى تكمل ومتقفش ، امال على كده ايه السبب الرئيسيى اللى ممكن يخلى الراجل يخون او يتجوز على مراته ؟

تركيزها فى الشغل ، والامور المنزلية والاولاد وده ممكن يؤدى الى عدم اهتمامها بنفسها وتنسى حقوقها الزوجية اللى مطلوبة منها ، ونفس الشئ للراجل لما يكون كل حياته شغل فى شغل وميديش لبيته اهتمام يبقى معنى عدم الاهتمام هنا يعنى انه مطنش مراته ، أولادة .. والراجل هنا مش معناه انه يصرف على البيت ويجيب الاكل والشرب بس

الراجل فى بيته ليها معانى كتيره وعمرها ما كانت بالصوت العالى ، ولا انا اللى كلمتى لازم تمشى ، ولا انا راجل البيت لو مش عاجبك الباب يفوت جمل !

الراجل بطبعة عقلانى زيادة عن اللزوم والمفروض يفكر ويكون حكيم فى قراراتة ومش متسرع ، الراجل المفروض يحتوى مراته فى وقت زعلها ويحاول يحل مشاكلها ويخرجها من المود بأى شكل من الاشكال مبطلبش منك تكون رومانسى وتجيب ( ورد أو شيكولاته ) بس ممكن تكون راجل جنتل مان وتأجل ميعاد شغل عشان خاطرها ، تعملها مفاجأة غير متوقعة ، تحسسها ان انت اللى ليها بعد ربنا فى الدنيا دى لانها طالما بقت فى عصمتك يبقى مسئولة منك انت

اما بالنسبة للست … لازم تبقى عارفه وعلى يقين ان الراجل ليه احترامة بلاش الصوت العالى ، واهتمى دايما بمشاكلة اللى فى شغله بدل ما الغريب يجى ويتدخل ، وخلى اللى بينك وبين جوزك محدش ليه دعوة بيه وده لنفسكم وبس متروحيش تقولي اسراركم لصحابك البنات محدش بيمسح دمعة حد .. يعنى لو جوزك ظروفة المادية صعبة ادعى ربنا انه ييسرلكم الاحوال او اقفى جنبه لو هتقدرى ده عمرة ما كان عيب ولا غلط

الراجل .. المفروض متمشيش بدماغ حد حتى لو الحد ده والدك او والدتك ، اللى بينك وبين مراتك يفضل بينك وبين مراتك يعنى مراتك عايزة تنزل وتشتغل وانت موافق ومامتك رفضت تروح أنت رافض ده اكبر غلط وده هيعمل فجوة مع مرور الوقت بينك وبين مراتك .. انت قرارك تقوله منك ليها مفيش مشكله تستشير مامتك او والدك بس متاخدش منهم قراراتك اللى هتنفذها مع مراتك لان انت كراجل مترضاش بالعكس .

الاهتمام مش كلام .. الاهتمام طول عمرة فعل

لو عاوزين العلاقة تكمل لازم نبعد عن كلام الناس ونخاف على نفسنا اكتر ونشجع بعض على كل حاجه حلوة ونهتم بنفسنا وطريقة لبسنا واسلوبنا وان الرجل لازم يعرف ان الانثى كائن رقيق مينفعش انى اجرحه بكلامى بمجرد انى عايز اى حاجه ، ولا الست تجرح الراجل بصوتها العالى او باسلوب غير لائق لانه مهما كان ده  راجل ليه ادبه واحترامة ولو نزلوا مره فى الارض يبقى عوضنا على الله 🙂