[ads1]
للتلج فوائد كتير للبشرة وممكن نستخدمه في وصفات نعملها بمكعبات التلج لعلاج مشاكل كتير في البشرة زي حروق الشمس والتهاب البشرة وانتفاخات تحت العين والهالات السوداء وعلاج الحبوب ..
مكعبات الالوفيرا لعلاج حروق الشمس:
لعلاج حروق الشمس بشكل فوري استخدمي مكعبات الالوفيرا هنجيب جل صبار الالوفيرا النقي من غير اي اضافات ونصبه في مكعبات الثلج ونسيبه يتجمد ونستخدمه على الاماكن اللي فيها حروق الشمس ده يعتبر علاج فوري يعني نخلي دايما في الفريزر عندنا المكعبات دي موجودة وجاهزة عشان نستخدمها وقت اللزوم..
مكعبات الخيار والعسل المنظفة للبشرة:
مكعبات الخيار والعسل بتنضف البشرة وبترطبها وبتخليها صحية ومنورة
اهرسي الخيار وضيفي عليه شوية عسل نحل وكام نقطة من عصير الليمون اخلطيهم مع بعض وبعدين صبي الخليط في مكعبات الثلج وسيبيها في الفريزر لحد ما تتجمد هنستخدمها بعد كده ندلك بيها الوش والرقبة في حركات دائرية لمدة 30 ثانية وممكن بعد ما تدلكي البشرة تسيبي بشرتك 10 دقايق وبعدين تغسليه..
مكعبات الشاي الاخضر لعلاج انتفاخات العين والهالات السوداء:
الشاي الاخضر من الحاجات اللي اثبتت فعاليتها جدا في علاج انتفاخات العين وتهدئة العين وده بسبب انه غني جدا بالمواد المضادة للاكسدة والكافيين المعروفين بفايدتهم للبشرة
هنعمل فنجان شاي اخضر بالطريقة العادية جدا وبعدين هنصبه في مكعبات الثلج ونسيبه يتجمد وبعدين نستخدمه ندلك بيه تحت العين هيخفف جدا من الانتفاخات لانه بيخلص حوالين العين من السوايل الزيادة وهيعالج الهالات السوداء..
مكعبات الليمون والبرتقان:
مكعبات الليمون والبرتقان بتساعد جدا في التخلص من الرؤوس السودا وعلاج البثور وعلاج التجاعيد وتفتيح البشرة.
اعصري الليمون والبرتقان بكميات متساوية وصبيهم في مكعبات الثلج وسيبيه يتجمد وبعدين دلكي بيها الوش والرقبة لمدة 30 ثانية وسيبي بشرتك نص ساعة وبعدين اغسليها بمية دافية وكرري الوصفة دي يوميا..
مكعبات اللبن لتبييض البشرة:
مكعبات اللبن من الحاجات الهايلة للبشرة بتساعد جدا على تبييض البشرة وبتعالج البثور و حب الشباب وعلاج التجاعيد.
صبي لبن كامل الدسم في قوالب الثلج وسيبيه لحد ما يتجمد خدي مكعب ثلج ودلكي بيه وشك ورقبتك لحد ما المكعب يدوب خالص وسيبي بشرتك ربع ساعة وبعدين اغسليها بمية دافية استخدمي الطريقة دي تلات مرات في الاسبوع ومع الوقت هتلاحظي فرق كبير على بشرتك..
Comments are closed.