الانشكاح هو الحل

موضوع الانشكاح مختلف تماما عن باقى المواضيع ، والغرض الرئيسيى منه هو ان الناس تعرف ان الانشكاح معناه انك تكون مبسوط وسعيد ومرتاح وراضى عن نفسك لأن احنا فى مجتمع ووقت محدش راضى على نفسة فيه والثقة فى نفسنا اصبحت معدومة

كلنا عارفيين التغيير من سلبى لأيجابى صعب ، لكن انى اكون انسان سلبى سهل زى ما كلنا عارفين ان صعب احلم اشتغل حاجة كبيرة او الحاجة اللى نفسى فيها واللى بحبها لكن سهل جدا اشتغل حرامى ( لذلك اى حاجة سلبية سهله اوى وأى حاجه ايجابية صعبة اوى )

بس من مفهوم الانشكاح الحقيقى هو انى احاول اسعد نفسى واسعد غيرى واخلى نيتى دايما صافية وانا بعمل اى حاجة لوجه الله وطبعا ( انما الاعمال بالنيات ولكل امرئ ما نوى )

لو كانت نيتنا خير على اللى احنا بنعمله وبنقدمة لغيرنا اجرنا وثوابنا هيبقى كبير عند ربنا سبحانه وتعالى وعلى فكرة ،، السعادة والانشكاح عمرهم ما كانوا بالفلوس .. ممكن جدا يكونوا بكلمة واحدة منك تغير معايير انسان كاملة من انسان مكتئب وحزين الى انسان يأمل ان الحياة لسه بخير ولكل فعل رد فعل يمكن انت بعدين تحتاج لحد فعلا هتلاقى بدل الواحد ألف واحد

الانشكاح ما هو الا عبارة عن ( ارضاء ربنا سبحانه وتعالى اولاً وارضاء الوالدين ورضائك على نفسك ) ومش معنى انك مش لاقى شغل يبقى الحياة صعبة وتفكر فى انتحار ، ومش معنى انك متجوزتش البنت اللى بتحبها يبقى ملكش لازمة فى الدنيا دى تذكر دائما ( قل لن يصيبنا الا ماكتب الله لنا ) واكيد ربنا شايل ليك الاحسن فى كل حاجة

خلى عندك امل وحاول تبقى سعيد من قلبك وحاول تسعد غيرك لو ده فى وسعك ومتنساش حقوق دينك واهلك ونفسك اللى عليك وابعد تماما عن الظلم والانانية والحقد والكره هتلاقى نفسك مبسوط بجد والناس بتحسدك على اللى انت فيه ووقتها هتعرف ان الانشكاح هو الحل 😉