أخر الاخبار
الرئيسية / كتابات / ثقافات عامة / ماهو المستحيل من وجهة نظرك

ماهو المستحيل من وجهة نظرك

ماهو المستحيل من وجهة نظرك

قبل البدء في موضعنا علينا اولا العلم بأن المستحيل الوحيد هو احياء الموتي بعد ذلك كل شئ ممكن …

هنحكي قصة صغيره ومنها هنفهم كلنا  ماهو المستحيل من وجهة نظرك  وازاى نخليه مش مستحيل ويبقى مجرد حلم بعيد عننا شويه وهنتعب واحنا بنحققه لكن هنحققه بقدرة الله وقدرة كن فيكون وبعد كده  بتصميمانا علي الحلم ومع الدراسه والعلم كل مستحيل هيتحول ويكون سهل وبسيط يلا نروح لحكايتنا بقي …

كان ياما كان كان في بنوته قلبها طيب وصغنتوته حلمها بس تطير في السماء زى العصفوره حاولت ياما وياما وياما وكل مره تلاقي صعوبه فجاة فكرت تجيب قمشات وتجمعهم يبقوا جناجات قامت جمعت القمشات ووصلتهم وهوبا تطير لكن وقعت برضه اتوجعت قامت تاني وقالت لازم اطير هما العصافير احسن مني ولا اجمل مني وكمان انا عاوزه اعيش في السما الارض دي مش مكاني هي متعرفش ان صعب تطير بس حاولت تاني وجابت ريش ولزق لزق  عملت جناح كبير ولبسته علشان تطير هو صحيح الريش خلا شكلها زى العصافير لكن برضه معرفتش تطير طب والحل البنوته بتبكي وتتوجع وتقول اه يادراعي اه ياجناحي ماهي مقتنعه انها عصفوره وحياتها فوق في السماء منظوره قامت تاني وحاولت تاني وتاني وتاني لكن كل محاولاتها ضاعت وكانت تنتهي بوجعها هي , بس باباها كان بيشوف نظره الامل ف عيونها فكر حبه وقال اساعدها فيها ايه لو بنتي تطير بس مش زى العصافير راح حاجز ليهم رحله وطاروا في الطيارة لرحلة للاقصر وهناك بقي البنوته شافت تاريخ اجدننا ورسمهم ولقت في الرسم صورة عصفوره فضلت تتخيل نفسها لحد مالرسمه خطفتها لزمان بعيد اوى عننا يبعد كده يجي بكام ميت سنه وراحت لحياه البدائيه وهناك شافت ناس بيولعوا النار بحجاره وناس لابسه في رجلها حاجه كده شبه القباب هوريكم صورته

ماهو المستحيل من وجهة نظرك

علشان تبقوا معاى ومركزين المهم البنوته حست انها مخطوفه قعدت تبكي وتبكي وتبكي لحد مجالها راجل كبير اوى كده  ساند علي عصايه وقالها مالها يابنتى مالك بتبكى قالتله جدو انا مخطوفه وعاوزه اروح لبابا وحكتله انها كانت جايه رحله  وجدو سمع الحكايه وقالها طيب وانتى عرفتى تطير زى العصفوره قالتله لا بس حولت قالها طيب انتى بس الزمن رجع بيكى لورا علشان تعرفى ان الزمان كل يوم بيجى جديد بيحصل فيه جديد شوفتى احنا ازاى وانتو عندكو ازاى مسيرك تطيرى زى العصافير ولو معرفتيش انتى تطير هتقدرى تخلى غيرك يطير بس امسكى في حلمك وتبتي فيه وحاولى بكل الطرق تحققيه لانه حلم جميل وانا متخيل قدامى الناس وهى بتطير الله شكلهم جميل اوى تعالى اتخيلى معاي كده تاني يابنتى وجدو حضنها وراحوا في الاحلام صحيت البنوته علي ايد بتلاعب شعرها وكانت الايد دى ايد باباها الحنينه وقامت البنوته فرحانه وبتجري زى اللى بيطير وقالت لباباها انا لما اكبر هدخل هدسنه وابقي مهندسه كبيره وااااه بابا عاوزاك تجبلى كتب عن الطيور والعصافير باباها قالها برضه لسه عاوزه تطيرى قالتله لا انا عاوزه اخلى كل الناس تطير هدرس واتعلم واشتغل علي الموضوع ده لحد موصل زى كل اللى وصلوا قلبي وعرفوا يحققوا احلامهم بابا فرح بيها اوى ووعدها يساعدها تحقق احلامها .

الفكره ان كلنا عندنا احلام شايفنها صعبه وممكن تكون مستحيله بس عندي سؤال لكل واحد يأس وشايف حلمه مستحيل ماهو المستحيل من وجهة نظرك ؟

مثلا هتقولي المستحيل هو شئ بعيد المنال عليا , او المستحيل هو حلم بحلمه لكن مش في ايدي احققه , او المستحيل هو القصه الوهمية اللي انتي حكتيها دى .

هقولك الاجابه ببساطه لو زمان اللي اخترع الطياره شافها مستحيل مكنش زمانك دلوقتي بتقدر تسافر في اي مكان وانت مطمن وفي اقل وقت تروح اي بلد مهما كانت بعيده , هقولك لو في مستحيل مكنتش مخترع الكهربا اخترعها ومكناش عرفنا نشغل اي اجهزه كهربائيه , لو في مستحيل مكنتش نيك فيوتتش وصل للي هو عاوز يوصله واتحدى أعاقته وكمل حياته بنظرة أمل .

المستحيل ده مبرر للفشل موجود في العقل وعلشان نحرر المستحيل لازم نتحرر من فشلنا ونقرر اننا احرار لا قيود لا مستحيل لا مبررات امام اي حلم حتي لو حلم بعيد مبقاش في مستحيل ممكن نقول حلم بعيد اجمل وافضل .

اضف رد

لن يتم نشر البريد الإلكتروني . الحقول المطلوبة مشار لها بـ *

*