أخر الاخبار
الرئيسية / ادم وحواء / المطبخ / نصائح لتجنب أخطاء المطبخ

نصائح لتجنب أخطاء المطبخ

13164242_892183184225667_7618943277559145892_n

مافيش حد فينا طبعا مش بيدخل المطبخ يوميا بس واحنا في المطبخ بنعمل غلطات مش بناخد بالنا منها وتقريبا هنلاقي معظمنا بيقع في نفس الغلطات دي في موضوعنا هنعرف ايه الغلطات دي اللي معظمنا تقريبا بيقع فيها من غير ما ياخد باله وهنعرف ازاي نتجنبها ..

13118895_892184707558848_4819386873543255330_n

* تخزين الاكل في علب بلاستيك وهو سخن:

كلنا طبعا بيفضل عندنا بواقي اكل وبنحطه في التلاجة عشان نحميه من انه يبوظ لان التلاجة بتمنع نمو البكتيريا الضارة اللي ممكن تسبب لنا تسمم غذائي لكن الغلطة بقى اللي بنقع فيها اننا بنحط الاكل في العلب البلاستيك وهو لسه سخن وده مضر جدا لان العلب البلاستيك فيها مواد كيميائية بتتفاعل مع الاكل السخن وبتسبب لنا امراض والدراسات اثبتت انه ممكن يسبب مشاكل في الانجاب وبعض انواع السرطان وكمان ممكن يسبب السمنة عشان كده من الافضل اننا نخزن الاكل في علب سيراميك او زجاج ونبعد عن البلاستيك ولو مضطره تحطي الاكل في العلب البلاستيك يبقى حطيه الاول على طبق ميكونش بلاستيك بردوا وحطيه في التلاجة وسيبيه لما يبرد خالص وبعدين انقليه في علبة بلاستيك واقفليها ..

13124999_892184720892180_3536489707319738329_n

* تخزين الخضار والفاكهة مع بعض:

معظمنا تقريبا بيعمل كده ترجعي من بره تكوني شارية خضار وفاكهة تفتحي التلاجة وتستسهلي وتحطيهم مع بعض في درج واحد لكن ده غلط جدا لازم الخضار يتخزن في درج لوحده والفاكهة في درج تاني وده ضروري لانه في بعض انواع الفاكهة بيخرج منها غاز الاثيلين زي ” التفاح والموز والغاز ده ممكن يضر الخضار اللي حواليه ويخليه يبوظ بسرعة كمان من الافضل اننا نخلي الفاكهة اللي ليها نواه ناشفة زي ” الخوخ والبرقوق  مثلا وكمان الطماطم بره التلاجة لان درجة الحرارة الباردة جوه التلاجة ممكن تهري النسيج بتاعها وتبوظها وخلي دايما الفاكهة اللي ممكن تتفعص زي العنب مثلا بعيد عن بعضها متخليهاش فوق بعض عشان متتفعصش وكمان عشان تديهم فرصة يوصل الهوا ليهم كويس ومتتعفنش جوه التلاجة ..

13173708_892184024225583_3644365238021621791_n

* فتح الفرن اثناء طهي الطعام:

لما بنكون بنعمل حاجة في الفرن طبعا معظمنا بيفتح الفرن يطمن على الاكل من وقت للتاني عشان ميتحرقش مننا لكن فتح الفرن كل شوية ده بيخلي درجة الحرارة بتاعة الفرن تنزل والفرن بيفقد جزء كبير من حرارته وده بيخلي الاكل ياخد فترة اطول انه يستوي عشان كده بالكتير اوي تفتحي الفرن مره واحدة بس والاكل جوه يعني كده في نص الوقت المتوقع ان الحاجة اللي انتي حطاها تستوي افتحي بصي عليها وستات البيوت بخبرتهم بيكونوا عارفين كل اكله محتاجة وقت قد ايه عشان تستوي يعني هتقدري تحسبي بالتقريب نص الوقت وتفتحي تبصي عليها وتقفلي الفرن تاني بسرعة او لو متوفر عندك لمبة الفرن يبقى مش هتحتاجي ساعتها تفتحي الفرن لانها هتستهل عليكي تشوفي الاكل من غير ما تفتحي عليه الفرن ..

13173787_892184660892186_817771718878778378_n

* شراء كميات توابل كبيرة:

في غلطة برده كتير مننا بيقع فيها لما بنيجي نشتري التوابل بنشتري كميات كبيرة وبنحطها في برطمانات عندنا وبنقول عشان تبقى موجودة ومش كل شوية نشتري لكن المشكلة انه بيحصل حاجتين ياما التوابل بتبوظ لما تقعد فترة طويلة ومش بنستفاد بيها كلها ونصها بيترمي وده طبعا هدر للميزانية بتاعتنا والحاجة التانية اللي ممكن تحصل انه نكهة التوابل بتروح ولما تحطيها في الاكل مش هتحسي بطعمها ولا هتشمي ريحتها لان التوابل دورها الاساسي بتنكه الاكل وتديه طعم وريحة حلوة لكن لما بتقعد فترة طويلة طبعا النكهة والريحة دي بتروح عشان كده لما نيجي نشتري التوابل نحاول اننا نشتري كميات صغيرة عشان متقعدش عندنا فترة طويلة ونقدر اننا نستهلكها لحد الاخر ولما تخلص نشتري تاني ولو مافيش توابل سايبة وهي اصلا في السوبر ماركت متخزنة في برطمانات مثلا نحاول نشتري اصغر حجم منها ولما تيجي تخزني التوابل في البيت عندك حطيها في برطمانات محكمة القفل وتكون في مكان بعيد عن الحرارة والضوء المباشر عشان تحافظي على نكهتها وريحتها فترة اطول وخلي جوه البرطمان معلقة خاصة لكل نوع توابل يعني متستخدميش معلقة واحدة لكل الانواع ..

 

اضف رد

لن يتم نشر البريد الإلكتروني . الحقول المطلوبة مشار لها بـ *

*