الرئيسية / كتابات / أشعار وحكم / أجمل رباعيات صلاح جاهين

أجمل رباعيات صلاح جاهين

145645380036610
مختارات من اجمل رباعيات صلاح جاهين

ورا كل شباك ألف عين مفتوحين

وأنا وانت ماشيين يا غرامى الحزين

لو التصقنا نموت بضربة حجر

ولو افترقنا نموت متحسرين

عجبي !!!

أنا شاب لكن عمرى ألف عام

وحيد لكن بين ضلوعى زحام

خايف ولكن خوفى منى أنا

أخرس ولكن قلبى مليان كلام

عجبى !!!

ضريح رخام فيه السعيد اندفن

و حفره فيها الشريد من غير كفن

مريت عليهم .. قلت يا للعجب

لاتنين ريحتهم لها نفس العفن

عجبي !!!

و الكون ده كيف موجود من غير حدود

و فيه عقارب ليه و تعابين ودود

عالم مجرب فات و قال سلامات

ده ياما فيه سؤالات من غير ردود

عجبي !!!

عجبتني كلمة من كلام الورق

النور شرق من بين حروفها و برق

حبيت أشيلها ف قلبي .. قالت حرام

ده أنا كل قلب دخلت فيه اتحرق

عجبي !!!

ياعندليب ما تخافش من غنوتك

قول شكوتك واحكى عن بلوتك

الغنوة مش هتموتك انما

كتم الغنا هو الى هيموتك

وعجبى !!!

اوصيك ياابنى بالقمر وبالزهور

اوصيك بليل القاهرة المسحور

وان جيت فى بالك اشترى عقد فل

لاى سمرا وقبرى اوعك تزور

وعجبى !!!

انشد ياقلبى غنوتك للجمال

وارقص فى صدرى من اليمين للشمال

ما هوش بعيد تفضل لبكرة سعيد

دة كل يوم فية الف الف احتمال

وعجبى !!!

فتحت شباكى لشمس الصباح

ما دخلش منة غير عويل الرياح 

وفتحت قلبى عشان ابوح بالالم

ما خرجش منة غير محبة وسماح

وعجبى !!!

حبيت لكن حب من غير حنان 

وصاحبت لكن صحبة ملهاش امان

رحت لحكيم واكتر لقيت بلوتى

ان الى جوة القلب مش ع اللسان

وعجبى !!!

يالى بتبحث عن الة تعبدة

بحث الغريق عن اى شئ ينجدة

الله جميل وعليم ورحمن ورحيم

احمل صفاتة وانت راح توجدة

وعجبى !!!

قالو السياسة مهلكة بشكل عام

وبحورها يابنى خشنة مش ريش نعام

غوص فيها تلقى الغرقانين كلهم

شايلين غنايم والخفيف عام

وعجبى !!!

يوم قولت ااة سمعونى قالو فسد

دة كان جدع قلبة حديد واتحسد

رديت على اللايمين انا وقولت ااة

لو تعرفو معنى زئير الأسد

وعجبى !!!

الفيلسوف قاعد يفكر سيبوة

لا تعملوة سلطان ولا تصلبوة

ما تعرفوش ان الفلاسفة ياهوة

الى يقولوة بيرجعوا يكدبوة

وعجبى !!!

كروان جريح مضروب شعاع م القمر

سقط من السموات فؤادة انكسر

جريت علية قطة علشان تبلعة

أتارية خيال شعراء وما لهوش أثر

وعجبى !!!

انا كنت شئ وصبحت شئ ثم شئ

شوف ربنا قادر على كل شئ

هز الشجر شواشية ووشوشنى قال

لابد ما يموت شئ عشان يحيا شئ

وعجبى !!!

ياباب يامقفول امتى الدخول

صبرت ياما واللى يصبر ينول

دقيت سنين والرد يرجع لى 

مين ؟

لو كنت عارف مين انا كنت اقول

وعجبى !!!

HaMeS

اضف رد

لن يتم نشر البريد الإلكتروني . الحقول المطلوبة مشار لها بـ *

*