أخر الاخبار
الرئيسية / ادم وحواء / ماسكات العسل الأسود

ماسكات العسل الأسود

ِِ1625605_861263480650971_2186183711859380587_n

النهاردة معانا ماسك للشعر يمكن يكون بمكون جديد خالص مش متعودين اننا نستخدمة على شعرنا وهو العسل الاسود

ماسك العسل الاسود اثبت فعاليته في ترطيب الشعر بعمق من بره ومن جوه يعني مجرد اكله بس مفيد جدا للشعر لان العسل الاسود مليان مغذيات طبيعية وفيتامينات ومعادن زي الماغنسيوم والحديد والكالسيوم والنحاس وغيرها من العناصر المفيدة جدا للشعر والعناصر دي كلها بتساعد على علاج فقر الدم وده بينعكس على شعرنا وكمان بشرتنا ده غير ان فيه مواد مضادة للاكسدة بتساعد على وقف الشيب المبكر.

اما فايدتة الخارجية بقى فالعناصر الموجودة فيه بتساعد على نمو وتغذية وتقوية الشعر وبتنعمه جدا وبترطبه بعمق كمان اللون الغامق للعسل بيساعد على تغطية الشعر الابيض وبيعالج الشيب مع الاستمرار عليه.

تعالوا بعد ما اتعرفنا على فوايد ماسك العسل الاسود نعرف المكونات والطريقة:

1- الوصفة الاولى:

المكونات:
ربع كوباية زبادي كامل الدسم.
معلقتين كبار عسل اسود.
معلقة صغيرة خل تفاح.
نقطتين من زيت الروز ماري او اكليل الجبل “اختياري مش لازم يتحط في الخلطة”.

طريقة التحضير والاستخدام:

هنخلط الزبادي مع العسل مع خل التفاح ونقلبهم مع بعض كويس بعد كده هنضيف زيت الروز ماري لو هنحطه مع الخلطة وهنقلبهم كويس, بعدين هناخد الخليط نحطه على الشعر وندلك بيه شعرنا كويس من الجذور لحد الاطراف وندلك بيه فروة الراس بعد ما ندلك الماسك في الشعر وفروة الراس كويس لمدة دقايق لحد ما نحس ان الشعر كله اتشرب من الماسك هنغطي شعرنا بطاقية الشعر او بكيس بلاستيك او نلفه بفوطة وممكن عشان تجيب نتيجة احسن نسخن الفوطة على البخار ونحطها على الشعر عشان الماسك يتغلغل كويس في فروة الراس وهنسيب الماسك على الشعر من 10 دقايق لربع ساعة وبعد كده هنغسل شعرنا بالشامبو والبلسم عادي, ممكن نكرر الماسك ده مرتين في الاسبوع او حسب ما شعرنا محتاج.

2- الوصفة التانية:

المكونات:
معلقتين كبار عسل اسود.
ربع كوباية بلسم من اللي انتي متعودة تستخدميه لشعرك.
معلقتين عسل نحل.

طريقة التحضير والاستخدام:

نخلط المقادير كلها مع بعض كويس ونحط الماسك على الشعر ونغطي شعرنا بطاقية الشعر ونسيبه من ربع ساعة ل 20 دقيقة وبعدين نغسل الشعر كويس بالشامبو والبلسم. والماسك ممكن تستخدمية على شعر ناشف قبل ما تغسلي شعرك بالشامبو او ممكن تحطيه بعد ما تغسلي شعرك بالشامبو على شعر مبلول, بس اللي بيجيب نتايج افضل انه يتعمل على شعر ناشف قبل غسيل الشعر بالشامبو.

مع الاستمرار على الماسكات هنلاحظ تغيير في ملمس الشعر وانه بقى اطرى وانعم وده غير انه هيغطي الشعر الابيض زي ما قولنا

images (6)

فــــــــــــــاطمة

2 تعليقان

  1. امم فعلا طريقة حلوه , بس اول وصفه اعتقد مش هيكفي ع شعري ممكن ازوده مفيش مشاكل صح , تسلم ايدك الحلوين ع الحاجات الحلوه دي .

  2. اعتقد هتكفي بس لو الشعر طويل جدا ممكن تزودي علي حسب طول شعرك .. تسلمي اروي

اضف رد

لن يتم نشر البريد الإلكتروني . الحقول المطلوبة مشار لها بـ *

*