أخر الاخبار
الرئيسية / ادم وحواء / اربع نصائح للتعامل بذكاء مع الشخص العصبي

اربع نصائح للتعامل بذكاء مع الشخص العصبي

images (1)

مافيش حد مننا خالي من العيوب وزي ما احنا شايفين العيب اللي في غيرنا اكيد غيرنا كمان شايف عيوبنا لكن السؤال هنا هو اد ايه الانسان بيكون مستعد يتحمل عيوب غيره ومتقبل طباعه واد ايه احنا مستعدين نحافظ على حياتنا ونحاول نتعامل مع عيوب الاشخاص اللي بيهمنا امرهم ونلاقي طريقة للتواصل ما بينا وبينهم من اكتر الطباع الصعبة اللي بتهدد اي علاقة هو طبع العصبية ولو انتي في حياتك شخص عصبي هنعرفك في موضوعنا نصايح للتعامل مع الشخص العصبي ..

1- اتعلمي تتحاوري معاه :
اول غلطة بتقع فيها اي واحدة في حياتها شخص عصبي هي انها بتتجنب العصبية بتاعته وبتضطر تسكت وتعدي المواقف عشان تهديه وبس وبتفضل تشيل من ناحيته وتتغير بالتدريج لغاية ما بتوصل للحظة ما بتقدرش تتحمل فإما انها بتبعد او بتنهار وبتتحول هي كمان لشخصية عصبية عشان كده مهم جدا ان بعد ما تنتهي نوبة عصبيته وتكوني في لحظة هدوء مع شريكك انك تطلبي منه مايجرحكيش مرة تانية وتقوليله بالظبط ايه اللي ضايقك منه عشان العتاب بيصفي المواقف وبينهيها من جوانا ..

2- احتويه وخليكي صديقته :
الانسان العصبي بيكون حساس اكتر من غيره يعني مثلا ممكن يكون مضغوط جدا في حاجة تخص شغله ومش عارف يعبر عن ده غير بطريقة العصبية المطلوب منك هنا انك تحتويه بس مش زي احتواء الام لا حاولي تكلميه زي الاصدقاء اكيد تنضيف البيت وتحضير الهدوم والفطار والعشا مهم وبيفرق معاه لكن حيفرق معاه اكتر لو حاولتي براحة تساليه ايه اللي مضايقه وحاولتي تلاقيه معاه حلول مفيده لمشكلته ..

3- بلاش المساومة :
اسوأ حاجة ممكن تعمليها لما تلاقي شريكك متعصب هي انك تساوميه يعني مثلا تقوليله مافيش غدا غير لما تبطل عصبية او مش هخرج معاك غير لما تهدا كل دي اساليب غلط لان العكس هو الصحيح زي انك تقوليه مثلا تعالى نخرج وتغير جو عشان نتناقش بهدوء او انك تعمليله الاكل اللي بيحبه وتقوليله استمتع دلوقتي بالاكل ونتناقش بعدين..

4- انصحيه من غير توجيه :
لما تحسي ان شريكك بيتصرف بشكل مش صح او بياخد خطوة مش مفيدة في حياته مثلا ابعدي عن طريقة الصح والغلط في الكلام عشان دي اكبر غلطه ممكن تعمليها ممكن تقوليله مثلا ليه مجربتش تتصرف بالشكل الفلاني؟ او فكر معايا كدا لو عملت كذا حتكون النتيجة ايه؟ لكن طريقة افعل ولا تفعل دي مش مناسبة للشخصية العصبية خالص ..

 

اضف رد

لن يتم نشر البريد الإلكتروني . الحقول المطلوبة مشار لها بـ *

*