أخر الاخبار
الرئيسية / ادم وحواء / وصفات طبية وتجميل / الحلقة الأولى : حمام بخار فى بيتك زى السبا لنهال هشام

الحلقة الأولى : حمام بخار فى بيتك زى السبا لنهال هشام

11214266_421725238028970_3583334792159305957_n

 

Le Garage 36 وع القهوة بتقدملكم أول مقال من مقالات جاية كتير في العناية بالبشرة…
يمكن أكتر حاجة مهمة للبنت في أي مناسبة، و قبل حتى إختيار المكياج المناسب، هي العناية بطبيعة بشرتها…

المكياج مهما كانت جودته فهو (تغيير لطبيعة لون فقط) و مايقدرش يخبّي شوائب البشرة او التراكمات لو مش بتهتمي ببشرتك. علشان كدا حمام البخار و الخطوات للعناية ببشرتك بعدها بتفضل انها تتعمل بشكل دوري كل اسبوعين،، او 3 اسابيع Minimum .

علشان كدا هنبتدي بمقال تعليمي للخطوات الأساسية الروتينية للعناية بالبشرة أياً كان نوعها إيه..

دي هتبقى خطوات ال Basic Facial Treatment اللي بتتعمل في أي بيوتي صالون، مع اختلاف المنتجات المستخدمة..

1- هنبتدي بتحضير حمام البخار، بإنك بتجيبي (وعاء) مضاد للحرارة.. و بتحطي فيه خلطتك المفضلة من الأعشاب الخاصّة بالبشرة – بتتجاب من أي عطّار و بتختلف على حسب نوع بشرتك- بتسخنيها الأول في ميّة، و بعدين بتزودي عليها ميّة مغلية (البخار).

2- في بيفضلوا يزودوا ميّة ورد، أو حتى بيجيبوا ورد طبيعي و بينضفوه و بعدين بيتغلّي في مية و بيتم استخدام بخار المية المغلية للورد الطبيعي. ميّة الورد معروفة بأنها ممكن تستخدم كتونر للبشرة قبل المكياج بشكل روتيني لجميع أنواع البشرة سواء دهنية، مركبّة او جافة لأنها بتحافظ على تعادل البشرة.

3- بعد ما بيتم إضافة الميّة المغلية، بتبعدي وشك عن الوعاء بمسافة عن مستوى الميّة نفسها من 30 سم الى 45 على حسب وصول البخار لوشك، و بتغطي فوق راسك و حوالين الوعاء بفوطة كبيرة بحيث انك توجهي البخار ناحية وشك.

4- في البيوتي صالون غالباً بيبقى عندهم جهاز للبخار، و لكن ممكن بكل بساطة تستغني عنه بخلطتك من الأعشاب و ميّة مغلية. بتفضلي في الوضع ده من 5 ل 8 دقايق. بخار الميّة بيساعد على ان مسام وشك تتفتح علشان تقدري تنضفيها بعد كدا بالطريقة المناسبة.

5- بتستخدمي Facial Scrub سواء منتج مشترياه او خلطة طبيعية متحضرة في البيت ( هنضيف طرق خلطات للبشرة لكل نوع في مقالات تانية). البشرة اللي بتحتاج أكتر للتقشير، بتبقى البشرة الجافّة، لأنه في الغالب نشفان البشرة بيؤدّي الى انها بتبان باهتة بسبب الطبقات من الجلد الميت اللي بتتجمع في اجزاء معينة، و ممكن تؤدي الى القشرة لما بتكون البشرة مركبة.

6- بعد (تدليك) السكرب و خصوصا عند المناطق اللي بتحسّي فيها عادة بشوائب زي (جانب الأنف) و ال(دقن) و ما بين الحاجبين عند معظم اللT-Zone، بتغسلي وشك إستعداداً للماسك.

7- الماسكات بتتنوع و بتبقى غالباً أهم خطوة، كل ده بيبقى تحضير ليها، لأنها بتبقى فيها المكونات الأساسية للعناية بنوع بشرتك. سواء بشرتك جافّة و محتاج مكونات مرطبة، أو دهنية و محتاجة مكونات لامتصاص الزيوت، او مركبة و محتاجة مكونات تعادل بين المنطقة الدعنية في ال T-Zone و المنطقة الجافة عند الخدود. (استنوا خلطات الماسكات الطبيعية للبشرة في المقالات الجاية)

8- آخر خطوة بعد ما تسيبي الماسك من فترة 15 دقيقة ل 20 دقيقة على وشك، انك بتغسلي و بتحطّي الكريم الخاص بيكي.

9- عن تجربة شخصية، يُفَضّل انك تعملي حمام البخار في وقت ماتكونيش هتتعرضي فيه للشمس بعدها.

10- العرايس او اي واحدة عندها مناسبة و عارفة انها هتجيب makeup artist او هتحط Full coverage foundation يُفضّل انها تعمل حمام البخار قبلها ب 10 ايام،، MAXIMUM 4 أيام لو مضطرة تعمله متأخر كدا… علشان البشرة بعد السكرب غالباً بتحتاج تهدا، او لو معملتهوش قبل كدا بتحتاج تستنى تشوف لو فيه حساسية من منتج معين استخدمته او عملته في البيت.

لـ الميكب ارتست: نهال هشام

 

2 تعليقان

  1. نايس ياقمر

  2. حلو اوي .. تسلم ايدك يا موري 🙂

اضف رد

لن يتم نشر البريد الإلكتروني . الحقول المطلوبة مشار لها بـ *

*