أخر الاخبار
الرئيسية / ادم وحواء / وصفات طبية وتجميل / نظام يومي وشهري للعناية ببشرة لــ نهال هشام

نظام يومي وشهري للعناية ببشرة لــ نهال هشام

10472674_458075724393921_6328737801183418826_n

 

مقالنا النهاردة عن كيفية الإعتناء بالبشرة الدهنية
هايبقى خاص بالبشرة الدهنية الأجزاء الدهنية عامة في البشرة المركبة اللي هي عند ال T-Zone

أول حاجة خالص، دي اكتر بشرة بتحتاج تستشيري فيها دكتور جلدية خصوصا لو عندك حب شباب كتير و ممكن يسببلك اثر حفر في الوش، الإعتناء اليومي وقاية من المشاكل الكتير ليها، و ممكن يقللها، بس لو حالتك صعبة استشيري دكتور جلدية و مش هتندمي.. و احتمال يعملك تنضيف عميق مختلف عن بتاع السبا و البيوتي صالون.. و يقدر يضيعلك 80% من المشاكل اللي في وشك في اول جلستين و ماعتقدش الجلسة تكلف اكتر من 150 جنيه.. فالموضوع يستاهل، استثمري في بشرتك أحسن ما تستثمري في مكياج… لأن جمالك الطبيعي هو الأهم..

#لازم_تعرفي انه على قد ما الإعتناء بالبشرة الدهنية ممكن يكون متعب و محتاج مجهود و مداومة أكتر من اي بشرة تانية، بس ميزتها انها آخر نوع بشرة بيعجز، التجاعيد بتبقى أقل في البشرة الدهنية و بتبقى عملية الشيخوخة فيها بشكل أبطأ من البشرة الجافة و العادية.. و مع ذلك لازم تحطي كريم حماية من أشعة الشمس بشكل يومي، لأن الشمس بتسبب أضرار على جميع أنواع البشرة على المدى البعيد لما بتتعرضيلها بشكل دائم.
هدفك الأساسي في العناية بالبشرة الدهنية انك تنظفي المسام، و ماتزوديش لمرحلة انك يجي لبشرتك جفاف.. لازم توصلي لتوازن
1) أول حاجة لازم تعرفيها، انه الغسول اليومي، حاجة أساسية للعناية بالبشرة الدهنية، لازم تغسلي وشك مرة الصبح و مرة بالليل قبل ماتنامي بغسول خاص ( او غسول بالزيت الطبيعي عند كل استحمام و هكتب شرحه قدام )
أي غسول هتشتريه ممكن يتراوح ما بين gentle cleanser لو بشرتك بتنشف بسرعة ، او صابون طبي، او غسول خاص بالبشرة الدهنية زي نيتروجينا.. بس لازم تعرفي ان معظم انواع الغسول القوي ممكن يجي بأثر عكسي و انه ينشف بشرتك تماما من الزيوت الطبيعية، و دي حاجة لازم نتفاداها، بأنك تجربي أنواع غسول لفترة و تكتبي أثرها على بشرتك ايه، علشان تعرفي انها مانفعتش معاكي..
مفروض برضه ماتوديش غسل وشك اكتر من مرتين، تلاتة بالكتير في اليوم لو بشرتك بتعرق كتير… علشان وشك ماينشفش تماماً
حاولي تبعدي تماما عن استخدام اي طرق ” كاشطة” للجلد اثناء التنضيف، زي فرش التنضيف، الحجر او الليف الخشن.. لأنه ممكن يسبب أثر عكسي في انه يزيح كل الدهون فيهيج الغدد انها تفرز دهون أكتر..
لما تدوري على غسول مناسب لبشرتك الدهنية حاولي تجيبيه كالتالي:
• يكون مكتوب عليه Oil Free
• يكون Gel-based ، أو Foam
• يكون فيه واحد من المركبات دي: Salicylic Acid, Tea tree oil, Neem, Turmeric, Honey.
لو قدرتي تجيبي POWER BRUSH
و دي ممكن تتجاب من على موقع Drugstore
او اي واحدة تطلبهاك من بره وبيبقى معاها 60 قطعة قطن بجل خاص من نيتروجينا، و بينفع تشتري القطن Refill لما تخلص..
اسمها Neutrogena Wave Sonic Power-Cleanser
و في منها أنواع كتير، بتعمل نوع من الVibration و لما بتبلي القطنة الفوم بيساعد على تنضيف وشك بشكل أعمق.. انا باستخدمها دايما على الT-zone عندي و بتطلع نتيجة فورية انها بتشيل اي شوائب حوالين الأنف و عند الجبهة و الدقن و بتخللي بشرتي super smooth
2) حاولي تجيبي سكرب خفيف تستخدميه مرتين في الأسبوع، و مرة كل اسبوعين مع حمام بخار. كون ان بشرتك بتطلع دهون، ده ممكن يسبب زيادة في خلايا الجلد الميت عن أنواع البشرات التانية ، و بالتالي بيؤدي الى ظهور البثور، الحبوب، الرؤوس البيضا، الرؤوس السودا بسبب تكوم التراب و قفل المسام.
3) بالنسبة للرؤوس السودا، حاولي تجيبي من الصيدليات او من قسم منظفات الوش من الهايبر ماركت زي مترو ماركت.. Nose-stripsماسك صيني خاص بالمناخير بيبقى في الغالب كوري او صيني مستورد و بيبقى قطعة من القماش اللي عليها جل خاص بتحطيها على المناخير بعد السكرب و البخار و تسيبيها ربع ساعة و بعدين تشيليها و في الغالب بتتخلص من الرؤوس السودا لو استمريتي عليها بشكل أسبوعي .
4) البشرة الدهنية بتحتاج ماسكات مقشرة PEEL OFF MASKS بشكل أسبوعي زي ماسك هيمالايا بالخيار و اللوز ، او لو عندك مسام واسعة،، تستخدمي ماسك طين لشد البشرة، زي ماسك الطين من أفون ، و ماسك الطين للوش و الجسم من Nature’s Bounty و يفضل أستخدام ماسك الطين برضه بعد استخدام الماسكات الكوري للرؤوس السودا علشان يشد المسام بعد إزالتها.
5) ممكن تجربي تستخدمي وصفات منزلية للمحافظة على رطوبة البشرة الدهنية بعد الماسكات المقشرة، او اسبوع و اسبوع..
من الماسكات المنزلية: اهرسي نص (بابايا) مع نصف ليمونة و حطيها على وشك ربع ساعة و بعدين اغسلي وشك
– قشري تفاحة طازة و قطعيها شرايح و بعدين اهرسيها و زودي عليها معلقتين عسل، و قلبيهم لغاية ما يعملوا عجينة، و سيبيها على وشك ربع ساعةو بعدين اشطفيها بماية دافية، ده هيقلل اللمعان، يشد البشرة و المسام و يرطب بشكل طبيعي.
6) استخدمي تونر خالي من الكحول بشكل يومي علشان يسيطر على الدهنية، اول ما تصحي و قبل ما تنامي.. مية الورد ممكن تستخدم كتونر طبيعي لأنها خالية من اي مواد ممكن تهيج البشرة.
7) إياكي تفتكري ان علشان بشرتك دهنية يبقى ماينفعش تحطيلها مرطبات، لأنك لما بتشيلي من بشرتك المرطبات تماما بتهيجي الغدد انها تفرز زيوت أكتر، حاولي تشتري مرطب خاص مش تقيل و يكون water based
ممكن تعتمدي على لوشن خاص بالبشرة الدهنية، و لازم كمان تجيبي كريم ليلي خاص بالبشرة الدهنية علشان يحافظ على رطوبة بشرتك و يغذيها اثناء النوم
و مكتوب عليه oil-free, non-comedogenic,
8) هتحتاجي معالج سريع، لو طلعتلك حبوب.. انا عن نفسي باستخدم حاجة طبية زي Kenacomb بس بياخد وقت عقبال ما الحباية تقل تدريجيا ممكن 3 ايام، و بسيبه طول ما انا قاعدة في البيت او قبل ما انام و احط فوقه بلاستر طبي علشان ما يتمسحش،، ممكن تجيبي من أفون Avon Clearskin Professional Invisible Blemish Treatment
أو فيه منتجات من أوريفليم خاصة و فيها مستخلص شجرة الشاي اللي هو مفيد جداً للجزء الدهني من البشرة
9) استخدمي دايما كريم حماية من الشمس، و جيبي خاص بالبشرة الدهنية و يكون gel-based
لأن عدم استخدامه هيؤدي لأضرار اكبر و هي تغير في اللون من جزء لجزء في بشرتك، النمش، و البقع البني

.
كُلّي على الأقل قطعة فاكهة يوميا، و اشربي مية كتير لأنها بتخرج السموم من جسمك و حاولي تخلي روتينك الغذائي يكون في خضرة كتير.. كل الكلام ده مع بعضه بيوازن جسمك و بيقلل عملية فرز الدهون
لــ نهال هشام

اضف رد

لن يتم نشر البريد الإلكتروني . الحقول المطلوبة مشار لها بـ *

*