أخر الاخبار
الرئيسية / كتابات / قصص قصيرة / افتكاسات وجنون العرب

افتكاسات وجنون العرب

افتكاسات وجنون العرب

العرب بالذات دايما تلاقي عندهم كل ما هو حصري وكل ما هو جديد وده بسبب ان عندنا كعرب الاشاعات سهل جدا تداولها ما بينا وبين بعض

باختصار شديد المقالة دي من باب الهزار والفضفضة لأن ببساطه مقدرش انتقد العرب ككل والعرب كلهم ليهم احترامهم ، لكن هتكلم عن حاجات بتحصل بالفعل وبتحصل عندنا احنا بشكل ملحوظ جدا جدا واول حاجه هتكلم عنها ” الألش الرخيص ،، يعنى لما تبقى قاعد مع شخص قريب جدا ليك وتلاقية ألش ألشه ممكن بسببها تقعد اسبوع بتكره النكت والضحك وتتخنق بسبب اللى عمله فيك والمصيبة انه عارف انها لا هتضحك ولا غيره بالعكس ”

من الحاجات اللى منتشرة اوي عند العرب كمان أن لو انت مشغل اغنيه رومانسية هتلاقي صاحبك او قريبك او اي حد ميعرفكش بيهزر معاك وبيقولك الله يسهله واللى اداك يدينا وايوة ياعم وماشيه معاك وايه ده ومش عارف ايه ولو بتسمع اغنيه حزينه هتلاقيه بيقولك انت مين اللى جرحك يابني ، قولي مين اللى خانتك وانا اجيبهالك او قوليلي مين زعلك ومين خانك واصبح عندهم مفهوم ان اللى بيسمع حزين يبقى مجروح واللى بيسمع رومانسي يبقى مرتبط طيب واللى بيسمع شعبي يبقى مبسوط واللى بيسمع قديم يبقى مزاجنجي

من الحاجات اللى منتشرة جدا جدا برضوا هي الابراج ودايما تلاقي كل واحد يقولك انت برج ايه تقوله انا برج الميزان مثلا يقولك انت اسعد واحسن برج ده انت محظوظ وذكي ونبيه طيب وانت برج ايه للاسف انا برج الحوت طيب وللاسف ليه اصل البرج ده برج نحس ومش هيتجوز وهيعنس ومش عارف ايه ! اللى هو يعني خلاص فعلا الابرامج بقت كده ؟ عقولنا كعرب متوجهة لأماكن كتير جدا غلط وبنؤمن بحاجات ليست صحيحة بالمرة مع الاسف ومحدش بيعترف ان ده كلام فاضي وتضييع وقت

من الحاجات المنتشرة بين العرب التريقة على بعضهم بطريقة سخرية ومضحكة زي مانا بعمل دلوقتي كده بالظبط 😀 , تلاقي دايما العربي فرحان انه بيتريق على عربي تاني

من اشهر اشتغالات العرب هو الاخبار الكاذبه زي عاجل وفاه … ، او حصريا شاهد قبل الحذف وده كله عشان يحقق مشاهدات وزيارات والزيارات بتجيب فلوس فيشتغلنا عشان يكسب هو اللى هو حاجه غريبة بجد واسلوب رخيص جدا

العرب دايما بيتميز بكلامة في التليفون وبالذات في السلامات .. لا اقفل انت الاول لا والله ما يصح طيب مع السلامه سلام في رعايه الله ، الله يخليك ، اشوفك بخير ، ربنا يباركلك ، مع السلامه ، لا ميصحش لازم تقفل انت الاول .. ها قفلت ؟ طيب يلا نقول 1 2 3 ونقفل سوا اللى هو يعنى حاجه جامده جدا

حاجه متكررة جدا وبالذات عند المصريين .. أن كلمه وحياة خالتك ( ده اسلوب استعجاب ) وحياة ابوك ( ده طلب ) وحياة امك ( دي شتيمة ) طبعا انا معرفش ده حصل بناءاً على ايه ولا ازاي وصلنا الفكر ده بس هو فعلا اصبح متداول ما بينا 😀

الموضوع ده من باب الهزار والضحُك أوعى حد يزعل

اضف رد

لن يتم نشر البريد الإلكتروني . الحقول المطلوبة مشار لها بـ *

*